"/>
Myanmar Kyat Converter
Yangon (Rangoon) Time
5:55 AM
တပ်မတော်နှင့် အစိုးရအနေဖြင့် ကချင်ပြည်နယ်အတွင်း ဖြစ်ပွားနေသော တိုက်ပွဲများကို အပြီးတိုင် ရပ်တန့်ပြီး တွေ့ဆုံဆွေးနွေးအဖြေရှာရန် ရှမ်းတိုင်းရင်းသားများ ဒီမိုကရေစီအဖွဲ့ချုပ်မှ သဘောထား ထုတ်ပြန်
Posted by nankeythioo
တပ်မတော်နှင့် အစိုးရအနေဖြင့် ကချင်ပြည်နယ်အတွင်း ဖြစ်ပွားနေသော တိုက်ပွဲများကို အပြီးတိုင် ရပ်တန့်ပြီး တွေ့ဆုံဆွေးနွေး အဖြေရှာ ရှမ်းတိုင်းရင်းသားများ ဒီမိုကရေစီ အဖွဲ့ချုပ်မှ ဇန်န၀ါရီလ ၁၆ ရက်နေ့တွင် သဘောထား ကြေညာချက် ထုတ်ပြန်ခဲ့ပါသည်။
ကချင်ပြည်နယ်၌ ဖြစ်ပွားနေသော ပဋိပက္ခများ၊ စစ်ပွဲ ပြဿနာများသည်
ပြေလည်ခြင်း မရှိသေးသည့် အပြင် ပိုမို ပြင်းထန်လာပြီး အစိုးရဘက်မှ စစ်လေယာဉ်များ၊ စစ်ရဟတ်ယာဉ်များဖြင့် အသုံးပြု ဆင်နွှဲလာသည်အထိ သတင်းမီဒီယာများတွင် မျက်ဝါးထင်ထင် မြင်တွေ့ခဲ့ရကြောင်း၊
နှစ်ဖက်အကြား ဖြစ်ပွားနေသော ပဋိပက္ခများကို နိုင်ငံရေး နည်းလမ်းဖြင့် မဖြေရှင်းဘဲ လက်နက်ဖြင့် ဖြေရှင်းကာ စစ်ပွဲများကို ဖန်တီးနေကြသည့် အတွက် အပြစ်မဲ့ ပြည်သူများ၊ ကလေးငယ်များနှင့် မိခင်များသည် လွန်စွာ အတိဒုက္ခ ရောက်နေရကြောင်း၊ ခရစ်တော် ဖွားမြင်တော်မူသည့် ခရစမတ်နေ့တွင် ကမ္ဘာနှင့်အ၀ှမ်း ပျော်ရွှင်ကြည်နူးစွာ
ဖြတ်သန်းနေကြချိန်တွင် ကချင်ဒေသ၌ အမျိုးသမီးများနှင့် ကလေးငယ်များသည် မလုံခြုံသော၊ မပြည့်စုံသော ဒုက္ခသည် စခန်းများတွင် ဆာလောင်မှုများ၊ သောကများ၊ စိုးရိမ်ထိတ်လန့်မှုများဖြင့် ၀မ်းနည်းကြေကွဲစွာ ဖြတ်သန်းနေခဲ့ရကြောင်း၊ ထို့အပြင် ဒုက္ခသည် စခန်းများတွင် ချမ်းအေးလှသည့် ကချင်ဒေသ၏ ဆောင်းရာသီကို အန်တုရင်း သားသည် မိခင်များသည် ၄င်းတို့၏ ရင်သွေးငယ်များကို တင်းကျပ်စွာ ပွေ့ဖက်ကာ ရင်ဆိုင်ကျော်လွှား နေရကြောင်း ရှမ်းတိုင်းရင်းသားများ ဒီမိုကရေစီ အဖွဲ့ချုပ်၏ ကြေညာချက်တွင်
ဖော်ပြခဲ့သည်။
အပြစ်မဲ့ ပြည်သူများ အတိဒုက္ခရောက်နေသော်လည်း နိုင်ငံတော် သမ္မတနှင့် ပြည်ထောင်စု အစိုးရ အဖွဲ့သည်လည်းကောင်း၊ ကချင်ပြည်နယ် ၀န်ကြီးချုပ်နှင့် ကချင်ပြည်နယ် အစိုးရသည် လည်းကောင်ဒ၊ ၂၀၁၀ ရွေးကောက်ပွဲတွင် မဲဆန္ဒနယ် ၈၀ ရာခိုင်နှုန်းကျော် အနိုင်ရရှိခဲ့သည့် လွှတ်တော်တွင်း အင်အားအကြီးဆုံး ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီသည်လည်းကောင်း၊ ကမ္ဘာငြိမ်းချမ်းရေး နိုဘယ်ဆုကို ရရှိခဲ့သော ဒေါ်အောင်ဆန်းစုကြည်သည် လည်းကောင်း ပဋိပက္ခများကို ပြေလည် ငြိမ်းအေးအောင် ၀င်ရောက် ဖြေရှင်းပေးနိုင်ခြင်း မရှိသည်ကိုလည်း မြင်တွေ့ရသည်ဟု ကြေညာချက်တွင် ပြောဆိုခဲ့သည်။
အစိုးရနှင့် တိုင်းရင်းသားများအကြား ပဋိပက္ခ ဖြစ်ပွားရခြင်း၏ အကြောင်းရင်းကို ဆန်းစစ်ကြည့်ပါက ပင်လုံစာချုပ်၏ အနှစ်သာရများ ဖြစ်သော တန်းတူရေးနှင့် ကိုယ်ပိုင် ပြဌာန်းခွင့် ရရှိရေးကို ကျင့်သုံး လိုက်နာမှု မရှိခဲ့ခြင်း အပေါ်တွင် အခြေခံသည်ကို သိသာ ထင်ရှားကြောင်း၊ နိုင်ငံတော်နှင့် အစိုးရ တစ်ရပ်လုံး အနေဖြင့် တိုင်းရင်းသားအရေးကို ပြေလည်အောင် ဖြေရှင်းရာ၌ တိကျသော မူဝါဒများကို စွဲကိုင်ပြီး ကတိက၀တ်များကိုလည်း လေးစား လိုက်နာရန် လိုအပ်သလို နိုင်ငံရေး ပြဿနာများကို နိုင်ငံရေး နည်းလမ်းအားဖြင့် ငြိမ်းချမ်းစွာ ဖြေရှင်းကြခြင်းသည်သာ ပြဿနာတစ်ခုလုံးကို ပြေလည်စေနိုင်သည့် တစ်ခုတည်းသော နည်းလမ်းဖြစ်သည်ဟု ရှမ်းတိုင်းရင်းသားများ ဒီမိုကရေစီ အဖွဲ့ချုပ်က
ကြေညာချက်တွင် ရေးသားခဲ့ပါသည်။
ထို့အတွက်ကြောင့် တပ်မတော်နှင့် နိုင်ငံတော် အစိုးရ အနေဖြင့် ပြည်ထောင်စု တစ်ခုလုံး၏ အကျိုးစီးပွားကို ငဲ့ကွက်လျက် တိုင်းရင်းသား ပြည်သူ တစ်ရပ်လုံးကို ထိခိုက်နစ်နာလျက်ရှိသည့် ကချင်ပြည်နယ်အတွင်း ဖြစ်ပွားလျက်ရှိနေသော စစ်ပွဲများကို အပြီးတိုင် ရပ်တန့်ကာ တွေ့ဆုံ ဆွေးနွေး အဖြေရှာ နည်းကိုသာ အလေးအနက်ထား ဆောင်ရွက်စေလိုကြောင်း ရှမ်းတိုင်းရင်းသားများ ဒီမိုကရေစီ အဖွဲ့ချုပ်မှ သဘောထား ထုတ်ပြန်ခဲ့ပါသည်။
0 comments:
Post a Comment